ઈઝરાયેલ અને હમાસ વચ્ચે છેલ્લા છ મહિનાથી વધુ સમયથી સંઘર્ષ ચાલી રહ્યો છે. હજારો લોકોના મોત થયા છે. ગાઝામાં વધી રહેલા માનવીય સંકટ વચ્ચે ઈઝરાયેલના વડાપ્રધાન બેન્જામિન નેતન્યાહુ પર યુદ્ધવિરામ માટે દબાણ વધી રહ્યું છે. અમેરિકી રાષ્ટ્રપતિ જો બિડેને ઇજિપ્ત અને કતારના નેતાઓને હમાસ પર દબાણ લાવવા કહ્યું છે. સમાચાર એજન્સી એપીના અહેવાલ મુજબ, બાયડેને આ દેશોને વિનંતી કરી છે કે તેઓ બંધકોને મુક્ત કરવાના કરારને લાગુ કરવા માટે હમાસ પર દબાણ કરે.
ઉલ્લેખનીય છે કે અમેરિકાના રાષ્ટ્રપતિ જો બિડેન અને ઈઝરાયેલના વડાપ્રધાન બેન્જામિન નેતન્યાહુએ ગુરુવારે એકબીજા સાથે ફોન પર વાત કરી હતી. આ દરમિયાન ગાઝાની સ્થિતિ પર ચર્ચા થઈ હતી. ફોન પર વાત કર્યાના થોડા કલાકો બાદ જ ગાઝાના લોકો માટે રાહતના સમાચાર સામે આવ્યા છે. ઇઝરાયેલના એક અધિકારીએ જણાવ્યું હતું કે ગાઝામાં વધુ માનવતાવાદી સહાયને મંજૂરી આપવા માટે ઇરેઝ બોર્ડર ક્રોસિંગને ફરીથી ખોલવાની મંજૂરી આપવામાં આવી છે.