આમ આદમી પાર્ટીના સાંસદ રાઘવ ચઢ્ઢાને રાજ્યસભામાંથી સસ્પેન્ડ કરવામાં આવ્યા છે. જ્યાં સુધી વિશેષાધિકાર સમિતિનો રિપોર્ટ ન આવે ત્યાં સુધી તેઓ ગૃહની કાર્યવાહીમાં ભાગ લઈ શકશે નહીં. વિશેષાધિકાર સમિતિનો રિપોર્ટ ન આવે ત્યાં સુધી AAPના રાજ્યસભા સાંસદ સંજય સિંહને સસ્પેન્ડ કરવાનો પણ નિર્ણય લેવામાં આવ્યો છે.
સભ્યોની સંમતિ વિના દરખાસ્તો મોકલવાનો આક્ષેપ
રાઘવ ચઢ્ઢા પર દિલ્હી સર્વિસ બિલને સિલેક્ટ કમિટીને મોકલવાના પ્રસ્તાવમાં બનાવટી કરવાનો આરોપ છે. તેમણે આ પ્રસ્તાવમાં સસ્મિત પાત્રા, નરહરિ અમીન, થમ્બીદુરાઈ, સુધાંશુ ત્રિવેદી અને નાગાલેન્ડના રાજ્યસભા સાંસદ ફાંગનોન કોન્યાકના નામ સામેલ કર્યા હતા, જ્યારે તેમણે આમાંથી કેટલાક સાંસદોની સંમતિ લીધી ન હતી. ભાજપના કેટલાક સાંસદોએ કહ્યું કે રાઘવ ચઢ્ઢાએ તેમની સંમતિ કે સહી લીધા વિના આ પ્રસ્તાવ મોકલ્યો છે.
ભાજપ ફસાવી રહ્યું છે – રાઘવ ચઢ્ઢા
આ મામલો સંસદની વિશેષાધિકાર સમિતિ સુધી પહોંચ્યો હતો અને સમિતિએ રાઘવ ચઢ્ઢાને નોટિસ પાઠવીને પૂછ્યું હતું કે શા માટે તેમની સામે પગલાં લેવામાં ન આવે. જો કે રાઘવ ચઢ્ઢાએ બાદમાં એક પ્રેસ કોન્ફરન્સ યોજીને નિયમ પુસ્તકને ટાંકીને કહ્યું હતું કે તેણે કંઈ ખોટું કર્યું નથી, ભાજપ તેમને ફસાવવાનો પ્રયાસ કરી રહી છે. તેમની સદસ્યતા રદ કરવાની આ એક યુક્તિ છે.
