અદાણીએ મેળવ્યો એશિયાના સૌથી અમીર વ્યક્તિનો તાજ, સંપત્તિ જાણીને તમે ચોંકી જશો

અદાણી ગ્રૂપના ગૌતમ અદાણી ફરી એક વખત એશિયાના સૌથી ધનિક વ્યક્તિ બની ગયા છે. તેમણે રિલાયન્સ જૂથના વડા મુકેશ અંબાણીને પાછળ રાખી દીધા છે અને હવે તેઓ 9.26 લાખ કરોડથી વધારે સંપત્તિ ધરાવે છે. તેના કારણે ગૌતમ અદાણી એશિયામાં સૌથી ધનિક છે અને સમગ્ર દુનિયામાં 11મા ક્રમે અમીર વ્યક્તિ છે. શુક્રવારે અદાણી જૂથના શેરોમાં વધારો થયો તેનાથી તેમની સંપત્તિમાં ઉછાળો આવ્યો હતો. અદાણીની 10 લિસ્ટેડ કંપનીઓ છે અને તેની માર્કેટ કેપિટલ 18 લાખ કરોડ રૂપિયાને વટાવી ગઈ છે.

હિન્ડનબર્ગ રિપોર્ટ બાદ અદાણી ગ્રૂપની ફ્લેગશિપ કંપની અદાણી એન્ટરપ્રાઈઝમાં જે ઘટાડો થયો હતો તે પણ સુપ્રીમકોર્ટના નિર્ણય બાદ સંપૂર્ણપણે રિકવર થઈ ગયો છે. હિન્ડનબર્ગના ધડાકા અગાઉ અદાણી એન્ટરપ્રાઈઝની જે વેલ્યૂ હતી તે ફરીથી મળી ગઈ છે.

અદાણીની સંપત્તિમાં રાત-દિવસ વધારો થતો જાય છે અને 2024માં અત્યાર સુધીમાં અદાણીની નેટવર્થ 2.23 લાખ કરોડ રૂપિયા જેટલી વધી છે જ્યારે અંબાણીની સંપત્તિમાં 1.05 લાખ કરોડ રૂપિયાનો વધારો નોંધાયો છે. અદાણીએ જાન્યુઆરી 2024માં લગભગ 12 મહિના પછી અંબાણીને પાછળ છોડી દીધા હતા. ત્યાર પછી અંબાણી ફરી આગળ થઇ ગયા હતા. હવે ફરી ગૌતમ અદાણી આગળ વધી ગયા છે. સુપ્રીમકોર્ટે હિન્ડનબર્ગ રિપોર્ટના આરોપોની તપાસ કરવાનો આદેશ આપ્યો ત્યાર પછી અદાણી માટે થોડા સમય સુધી મુશ્કેલી રહી હતી. ત્યાર પછી તપાસ પૂરી થઈ અને અદાણી જૂથ આરોપોમાંથી મુક્ત થયું હતું. બ્લૂમબર્ગના ઇન્ડેક્સમાં મુકેશ અંબાણી 9.10 લાખ કરોડની સંપત્તિ સાથે 12મા સ્થાને છે. જ્યારે બર્નાડ આર્નોલ્ટ 17.27 લાખ કરોડની સંપત્તિ સાથે ટોપ પર છે.

અંબાણીને પાછળ છોડ્યા

ગૌતમ અદાણીની સંપત્તિ 111 અરબ ડોલર થતાં તે વિશ્વના અગિયારમાં નંબરના અમીર વ્યક્તિ બન્યા છે. તો અંબાણીની સંપત્તિ 109 બિલિયન ડોલર થતાં તે 12માં નંબરે પોંહચી ગયા છે. શુક્રવારે અંબાણીની સંપત્તિ 76.2 મિલિયન ડોલર વધી. તો આ વર્ષમાં તેમની સંપત્તિમાં 12.7 બિલિયન ડોલરનો વધારો નોંધાયો છે.

સંપત્તિમાં 5 બિલિયન ડોલર જેટલો વધારો

બ્લૂમબર્ગ બિલિયોનર્સના રિપોર્ટ મુજબ શુક્રવારે ટોપ 12 અમીર વ્યક્તિઓમાં એલન મસ્ક, જેફ બેઝોસ અને લેરી એલિસનની સંપત્તિમાં ઘટાડો જોવા મળ્યો. તો ગૌતમ અદાણીની સંપત્તિમાં જોરદાર ઇજાફો જોવા મળ્યો. જેમાં અદાણીની સંપત્તિ 5 બિલિયન ડોલર જેટલી વધી. તો અંબાણીની સંપત્તિમાં મામૂલી વધારો નોંધાયો.

2023ની શરૂઆતમાં અમેરિકન શોર્ટ સેલર હિંડનબર્ગના રિપોર્ટના લીધે અદાણીના શેર ધડાકા સાથે તૂટી ગયા હતા. ગૌતમ અદાણીની કેટલીક કંપનીઓની વેલ્યૂએશન અડધાથી ઓછી થઇ ગઇ હતી. જોકે આ આંચકા પછી અદાણી ઉપર આવી ગયા છે.

બ્લૂમબર્ગ બિલેનિયર્સ ઈન્ડેક્સ મુજબ કોણ ટોપ-10માં છે

• ફ્રાન્સના બર્નાર્ડ આર્નોલ્ટ પાસે 207 અબજ ડોલરની સંપત્તિ છે.
• એલોન મસ્ક (203 બિલિયન ડોલર) સાથે બીજા સ્થાને છે
• જેફ બેઝોસ (199 બિલિયન ડોલર) સાથે ત્રીજા સ્થાને છે.
• Metaના CEO માર્ક ઝકરબર્ગ (166 બિલિયન ડોલર) ચોથા સ્થાને છે
• લેરી પેજ (153 બિલિયન ડોલર) પાંચમા નંબર પર છે
• બિલ ગેટ્સ (152 બિલિયન ડોલર) છઠ્ઠા ક્રમ પર છે
• સર્ગેઈ બ્રિન (145 બિલિયન ડોલર) સાતમા સ્થાને છે.
• સ્ટીવ બાલ્મર (144 બિલિયન ડોલર) આઠમા નંબરે છે.
• વોરેન બફેટ (137 બિલિયન ડોલર) સાથે નવમા નંબરે છે.
• લેરી એલિસન (132 બિલિયન ડોલર) દસમા નંબરે છે.