Ahmedabad : દિલ્હીમાં ત્યારે ગભરાટ ફેલાયો હતો જ્યારે રાષ્ટ્રીય રાજધાનીની 21 હોસ્પિટલોને બોમ્બની ધમકી ધરાવતો ઈ-મેલ મોકલવામાં આવ્યો હતો. આ પછી પોલીસ, ફાયર અને બોમ્બ સ્કવોડની ટીમોએ તપાસ કરી પરંતુ તેમને કંઈ મળ્યું નહીં. તેવી જ રીતે રવિવારે અમદાવાદ એરપોર્ટને બોમ્બથી ઉડાવી દેવાની ધમકી પણ ઈ-મેલ દ્વારા મળી હતી. આ પછી સુરક્ષાકર્મીઓએ એરપોર્ટ પરિસરમાં સર્ચ કર્યું હતું. જો કે આ એક અફવા સાબિત થઈ. આ દરમિયાન કોઈ શંકાસ્પદ વસ્તુ મળી ન હતી.
પોલીસ કમિશનર જીએસ મલિકે જણાવ્યું હતું કે સરદાર વલ્લભભાઈ પટેલ ઈન્ટરનેશનલ એરપોર્ટના ઓફિશિયલ ઈ-મેઈલ આઈડી પર એક અજાણ્યા વ્યક્તિ દ્વારા બપોરે ધમકીભર્યો ઈ-મેલ મોકલવામાં આવ્યો હતો. આ પછી સુરક્ષાકર્મીઓએ આખા એરપોર્ટની તલાશી લીધી હતી. આ ધમકી અફવા હોવાનું બહાર આવ્યું કારણ કે કંઈપણ શંકાસ્પદ મળ્યું નથી. એરપોર્ટના એક અધિકારીએ જણાવ્યું – બોમ્બની ધમકીની માહિતી મળતા જ CISF તરત જ એક્શનમાં આવી ગયું. બપોર પછી આખા એરપોર્ટની સારી રીતે શોધખોળ કરવામાં આવી હતી પરંતુ કંઈ મળ્યું ન હતું. સાવચેતીના ભાગરૂપે સુરક્ષા વધારી દેવામાં આવી છે.
તમને જણાવી દઈએ કે રાજધાની દિલ્હીની 21 હોસ્પિટલોને બોમ્બની ધમકી ધરાવતો ઈ-મેલ મોકલવામાં આવ્યો હતો. તેમાંથી બુરારી હોસ્પિટલ અને સંજય ગાંધી હોસ્પિટલે લગભગ 3 વાગ્યે ઈ-મેલ જોયા બાદ પોલીસને જાણ કરી હતી. તપાસ દરમિયાન સામે આવ્યું કે આ મેલ અન્ય હોસ્પિટલોને પણ મોકલવામાં આવ્યો હતો. આ પછી પોલીસે સંબંધિત હોસ્પિટલોને જાણ કરી. સંજય ગાંધી હોસ્પિટલ અને બુરારી હોસ્પિટલને મોકલવામાં આવેલા મેલમાં આ હોસ્પિટલોના ઈ-મેલનો પણ સમાવેશ કરવામાં આવ્યો હતો.
દિલ્હી ફાયર સર્વિસ ડિપાર્ટમેન્ટે રવિવારે કહ્યું કે IGI એરપોર્ટને પણ ઈ-મેલ મોકલીને બોમ્બની ધમકી મળી છે. તમને જણાવી દઈએ કે આવી જ રીતે 11 દિવસ પહેલા 1 મેના રોજ દિલ્હી-નેશનલ કેપિટલ રિજન (NCR)ની 150થી વધુ સ્કૂલોને એક ઈમેલ મળ્યો હતો જેમાં તેમને બોમ્બથી ઉડાવી દેવાની ધમકી આપવામાં આવી હતી. જેના કારણે વિદ્યાર્થીઓ અને વાલીઓમાં ગભરાટ ફેલાયો હતો. અધિકારીઓને તપાસ દરમિયાન કંઈ વાંધાજનક મળ્યું ન હતું.
