ટામેટાં, ડુંગળી અને હવે અનાજ મોંઘા થયા બાદ મોંઘવારી દરમાં રાહત મળવાની આશા નથી. શાકભાજીના ભાવ ઘટાડવા માટે સરકાર દ્વારા પગલા લેવામાં આવ્યા છે. પરંતુ અનાજની વધતી કિંમતને કારણે ઓગસ્ટમાં પણ છૂટક ફુગાવાનો દર ઊંચો રહેવાની ધારણા છે. અગાઉ, તે જુલાઈમાં 7.4 ટકાના 15 મહિનાના ઉચ્ચ સ્તરે પહોંચ્યો હતો. ઓગસ્ટના ફુગાવાના દરના આંકડા 12 સપ્ટેમ્બરે જાહેર કરવામાં આવશે.
સપ્ટેમ્બરથી ફુગાવો ઘટવાની ધારણા છે
ટામેટાં જેવા શાકભાજીના ભાવમાં ઘટાડો, નોન-બાસમતી ચોખાની નિકાસ પર પ્રતિબંધ અને સ્થાનિક એલપીજી સિલિન્ડરની કિંમતમાં ઘટાડો થવાને કારણે સપ્ટેમ્બરથી તે નરમ થવાની ધારણા છે, એમ સૂત્રોએ જણાવ્યું હતું. ગયા અઠવાડિયે, ભારતીય રિઝર્વ બેંક (RBI)ના ગવર્નર શક્તિકાંત દાસે પણ કહ્યું હતું કે સેન્ટ્રલ બેંક સપ્ટેમ્બરથી ફુગાવો ઘટવાની અપેક્ષા રાખે છે.
અન્ય શાકભાજીના છૂટક ભાવમાં ઘટાડો થવાની શક્યતા છે
તેમણે કહ્યું હતું કે, ‘અમને આશા છે કે સપ્ટેમ્બરથી ફુગાવાનો આંકડો ઘટવા લાગશે. ઓગસ્ટમાં ફરી એકવાર મોંઘવારી ખૂબ ઊંચી રહેશે. પરંતુ અમે અપેક્ષા રાખીએ છીએ કે સપ્ટેમ્બરથી ફુગાવો ઘટશે.દાસે કહ્યું હતું કે ટામેટાંના ભાવ પહેલાથી જ ઘટી ગયા છે અને અન્ય શાકભાજીના છૂટક ભાવ પણ આ મહિનાથી નીચે આવવાની ધારણા છે.
સૂત્રોએ જણાવ્યું કે RBI 8 સપ્ટેમ્બરે કેશ રિઝર્વ રેશિયો (CRR)ની સમીક્ષા કરી શકે છે. કેન્દ્રીય બેંકે ગયા મહિને સિસ્ટમમાંથી રૂ. 1 લાખ કરોડની વધારાની રોકડ બહાર કાઢવા માટે મર્યાદિત સમયગાળા માટે 10 ટકા કેશ રિઝર્વ રેશિયો (CRR) લાગુ કર્યો હતો.
