ભારતીય જનતા પાર્ટી (BJP)ની સંસદીય દળની બેઠક આજે મળી હતી. જેમાં વડાપ્રધાન નરેન્દ્ર મોદીનું સન્માન કરવામાં આવ્યું હતું. આ બેઠક સંસદ ભવન સંકુલમાં થઈ હતી. આ દરમિયાન તેમને હાર પહેરાવીને સન્માનિત કરવામાં આવ્યા છે. આ દરમિયાન ભાજપના સાંસદોએ સૂત્રોચ્ચાર કર્યા હતા. 3 રાજ્યોમાં ચૂંટણી પરિણામો જાહેર થયા બાદ તેમનું સન્માન કરવામાં આવ્યું છે.
આ પહેલા સોમવારે જ્યારે વડાપ્રધાન નરેન્દ્ર મોદી સંસદના શિયાળુ સત્રના પ્રથમ દિવસે સંસદ ભવન પહોંચ્યા ત્યારે મોદી-મોદી અને ભારત માતા કી જયના નારા લગાવીને ગૃહમાં તેમનું સ્વાગત કરવામાં આવ્યું હતું. ભાજપના સાંસદોએ લગભગ ત્રણ મિનિટ સુધી તાળીઓ પાડીને પીએમ મોદીનું સ્વાગત કર્યું. કહેવામાં આવી રહ્યું છે કે આ બેઠકમાં મધ્યપ્રદેશ, રાજસ્થાન અને છત્તીસગઢના મુખ્યમંત્રીઓના નામ પર ચર્ચા થઈ શકે છે. તમને જણાવી દઈએ કે આજે શિયાળુ સત્રના ચોથા દિવસે ભાજપ સંસદીય દળની બેઠક યોજાઈ હતી.
પીએમ મોદી જ્યારે સંસદીય દળની બેઠકમાં પહોંચ્યા ત્યારે કેન્દ્રીય ગૃહમંત્રી અમિત શાહ, ભાજપ અધ્યક્ષ જેપી નડ્ડા અને તમામ સાંસદોએ તેમનું ભવ્ય સ્વાગત કર્યું હતું. આ દરમિયાન ‘મોદી ગેરંટી’ના નારા લાગ્યા હતા. ભાજપ સંસદીય દળની બેઠકમાં પાર્ટીના તમામ લોકસભા સભ્યો અને રાજ્યસભાના સભ્યો હાજરી આપે છે. સામાન્ય રીતે આ બેઠક સત્ર દરમિયાન દર મંગળવારે યોજાય છે પરંતુ આ અઠવાડિયે મંગળવારે આ બેઠક મળી શકી નથી.
બેઠકોમાં મોદી અને બીજેપીના અન્ય વરિષ્ઠ નેતાઓ સંસદીય એજન્ડા અને પક્ષના સંગઠનાત્મક અને રાજકીય અભિયાનો સંબંધિત વિવિધ મુદ્દાઓ પર તેમના મંતવ્યો રજૂ કરે છે. વડાપ્રધાન સભામાં પહોંચતાની સાથે જ ભાજપના સાંસદોએ ઉભા થઈને તાળીઓ પાડી અને ‘વેલકમ ભાઈ, મોદીજીનું સ્વાગત’ના નારા લગાવ્યા. ભાજપના પ્રમુખ જેપી નડ્ડાએ તાળીઓના ગડગડાટ વચ્ચે વડા પ્રધાનને હાર પહેરાવીને આવકાર્યા હતા.
