ઓલિમ્પિયન CA ભવાની દેવીએ સોમવારે ચીનના વુક્સીમાં એશિયન ફેન્સિંગ ચેમ્પિયનશિપમાં મેડલ જીત્યો હતો. સેમિફાઇનલમાં, ભવાનીએ ઉઝબેકિસ્તાનની ઝેનાબ ડેબેકોવા સામેની સખત લડાઈમાં 14-15થી પરાજય મેળવ્યો હતો પરંતુ પ્રતિષ્ઠિત ઇવેન્ટમાં ભારતનો પ્રથમ મેડલ સુનિશ્ચિત કર્યો હતો.
ભવાનીએ ક્વાર્ટર ફાઇનલમાં ડિફેન્ડિંગ વર્લ્ડ ચેમ્પિયન જાપાનના મિસાકી ઈમુરાને 15-10થી હરાવીને અપસેટ સર્જ્યો હતો. મિસાકી સામે ભવાનીની આ પ્રથમ જીત હતી. આ પહેલા તે જાપાની ખેલાડી સામે તેની તમામ મેચ હારી ગઈ હતી.
ભવાનીને રાઉન્ડ ઓફ 64માં બાય મળ્યો હતો અને ત્યારબાદ તેણે કઝાકિસ્તાનની ડોસ્પ કરીનાને આગળના રાઉન્ડમાં હરાવ્યો હતો. ભારતીય ખેલાડીએ પ્રી-ક્વાર્ટર ફાઇનલમાં ત્રીજી ક્રમાંકિત ઓઝાકી સેરીને પણ 15-11થી અપસેટ કરી હતી. ફેન્સિંગ એસોસિએશન ઓફ ઈન્ડિયાના જનરલ સેક્રેટરી રાજીવ મહેતાએ ભવાનીને તેની ઐતિહાસિક સિદ્ધિ બદલ અભિનંદન પાઠવ્યા છે.
મહેતાએ પીટીઆઈને કહ્યું, “ભારતીય ફેન્સીંગ માટે આ ખૂબ જ ગર્વનો દિવસ છે. ભવાનીએ એ કરી બતાવ્યું જે આ પહેલા કોઈ મેળવી શક્યું નથી. પ્રતિષ્ઠિત એશિયન ચેમ્પિયનશિપમાં મેડલ જીતનારી તે પ્રથમ ભારતીય ફેન્સર છે. હું સમગ્ર ફેન્સીંગ વિશ્વ વતી તેમને અભિનંદન આપું છું.”
