International News: આર્થિક મંદી અને નબળી પડી રહેલી બિઝનેસ સેન્ટિમેન્ટનો સામનો કરી રહેલા ચીને આ વર્ષે પાંચ ટકાની સાધારણ આર્થિક વૃદ્ધિનું લક્ષ્ય નક્કી કર્યું છે. આ સાથે પડોશી દેશે પણ વધતી બેરોજગારીની ચિંતા વચ્ચે 1.2 કરોડ નોકરીઓનું સર્જન કરવાનું વચન આપ્યું છે. ચીનના વડા પ્રધાન લી કિઆંગે દેશની રબર-સ્ટેમ્પ સંસદ, નેશનલ પીપલ્સ કોંગ્રેસ (એનપીસી) ના ઉદ્ઘાટન સત્રમાં રજૂ કરેલા તેમના અહેવાલમાં આશા વ્યક્ત કરી હતી કે આ વર્ષે શહેરી વિસ્તારોમાં 12 મિલિયનથી વધુ નોકરીઓનું સર્જન થશે.
આ વર્ષે શહેરી બેરોજગારી દર આશરે 5.5 ટકા રહેવાનો અંદાજ છે. લગભગ અઠવાડિયા સુધી ચાલેલા NPC વાર્ષિક સત્રમાં ચીનના રાષ્ટ્રપતિ શી જિનપિંગ અને દેશભરમાંથી 2,000 થી વધુ પ્રતિનિધિઓએ હાજરી આપી હતી. આ દરમિયાન વિશ્વની બીજી સૌથી મોટી અર્થવ્યવસ્થાના વિકાસને મજબૂત કરવા માટે જરૂરી પહેલો પર ચર્ચા કરવામાં આવી હતી.
ચીને ખાધને ગ્રોસ ડોમેસ્ટિક પ્રોડક્ટ (જીડીપી)ના ત્રણ ટકા પર રાખીને 2024 સુધી સક્રિય રાજકોષીય નીતિ અને સમજદાર નાણાકીય નીતિ ચાલુ રાખવાનું વચન આપ્યું હતું. લીએ તેમના 39 પાનાના વર્ક રિપોર્ટમાં જણાવ્યું હતું કે સરકારની ખાધ 2023ના બજેટના આંકડાથી 180 બિલિયન યુઆન (US$26 બિલિયન) વધશે. ગયા વર્ષે ચીને 5.2 ટકાની વૃદ્ધિ નોંધાવી હતી.
