ઈટાલીમાં સોમવારે ભૂકંપના આંચકા અનુભવાયા હતા. ભૂસ્તરશાસ્ત્રીઓ અને અગ્નિશામકોએ જણાવ્યું હતું કે સોમવારે વહેલી સવારે ટસ્કનીના ભાગોમાં 4.8 તીવ્રતાનો ભૂકંપ આવ્યો હતો. કોઈ નુકસાન અથવા ઈજાના તાત્કાલિક અહેવાલ નથી.
ઇટાલીની ઇન્સ્ટિટ્યૂટ ઑફ જીઓફિઝિક્સ એન્ડ વોલ્કેનોલોજી અનુસાર, ભૂકંપનું કેન્દ્ર ફ્લોરેન્સના ઉત્તરપૂર્વમાં મરાડી નજીક હતું અને તે સવારે 5.10 વાગ્યે ત્રાટક્યું હતું. બાદમાં વધુ કેટલાક નાના આંચકા અનુભવાયા હતા.
ઇટાલીની ફાયર રેસ્ક્યુ ટીમે જણાવ્યું હતું કે તેમને ચિંતિત રહેવાસીઓ તરફથી કેટલાક કોલ મળ્યા હતા પરંતુ હજુ સુધી નુકસાન અથવા ઇજાના કોઈ અહેવાલ નથી.
એજન્સીએ નોંધ્યું છે કે આ વિસ્તારને ભૂકંપ માટે ઉચ્ચ જોખમ માનવામાં આવે છે. ખાસ કરીને, 1919ના મુગેલો ભૂકંપને 20મી સદીમાં ઇટાલીમાં આવેલા સૌથી શક્તિશાળી ધરતીકંપોમાંના એક તરીકે ટાંકવામાં આવ્યો હતો.
