જો તમારી પાસે કોઈપણ કંપનીની હેલ્થ ઈન્સ્યોરન્સ પોલિસી છે તો આ સમાચાર તમારા માટે છે. હા, ઈન્સ્યોરન્સ રેગ્યુલેટરી એન્ડ ડેવલપમેન્ટ ઓથોરિટી (IRDAI) દ્વારા ગ્રાહકોના હિતોને ધ્યાનમાં રાખીને નવો આદેશ જારી કરવામાં આવ્યો છે. આ આદેશ હેઠળ, વીમા કંપનીને ગ્રાહકો માટે ગ્રાહક માહિતી પત્રક (CIS) સરળ બનાવવા માટે કહેવામાં આવ્યું છે. આ હેઠળ, વીમા કંપનીએ દાવા વિશેની માહિતીની સાથે વીમાની રકમ અને પોલિસીમાં આવરી લેવામાં આવેલા ખર્ચ જેવી પોલિસીની મૂળભૂત માહિતી આપવી પડશે.
આ નિયમ 1 જાન્યુઆરી, 2024થી અમલમાં આવશે
1 જાન્યુઆરીથી ગ્રાહકોને નિયત ફોર્મેટમાં આ અંગેની માહિતી મળશે. IRDAI એ ગ્રાહકોને બધું સમજાવવા માટે હાલની ગ્રાહક માહિતી પત્રક (CIS) માં ફેરફારો કર્યા છે. વીમા નિયમનકારે આ સંબંધમાં તમામ વીમા કંપનીઓને મોકલેલા પત્રમાં જણાવ્યું છે કે નવી CIS 1 જાન્યુઆરી, 2024થી અમલમાં આવશે. ઓથોરિટીએ કહ્યું કે પોલિસીધારક માટે ખરીદેલી પોલિસીના નિયમો અને શરતોને સમજવી મહત્વપૂર્ણ છે.
આ પત્ર અનુસાર, ‘પોલીસી સંબંધિત પેપર ગ્રાહક માટે સમજવું મુશ્કેલ હોઈ શકે છે. આવી સ્થિતિમાં, પેપર એવું હોવું જોઈએ કે તે પોલિસી સંબંધિત મૂળભૂત માહિતીને સરળ શબ્દોમાં સમજાવે. તેમજ તમામ માહિતી તેમાં હાજર હોવી જોઈએ. પરિપત્ર અનુસાર, વીમા કંપની અને પોલિસીધારક વચ્ચે પોલિસી સંબંધિત મુદ્દાઓમાં મતભેદને કારણે ઘણી ફરિયાદો મળી રહી છે. તેને ધ્યાનમાં રાખીને સીઆઈએસ ફેરફારો સાથે જારી કરવામાં આવ્યું છે.
નવા CISમાં, કંપનીએ વીમા ઉત્પાદન/પોલીસીનું નામ, પોલિસી નંબર, વીમા ઉત્પાદન/પોલીસીનો પ્રકાર અને વીમાની રકમ વિશે માહિતી આપવી પડશે. આ ઉપરાંત, પોલિસીધારકને પોલિસીમાં સમાવિષ્ટ ખર્ચ, બાકાત, રાહ જોવાની અવધિ, કવરેજની નાણાકીય મર્યાદા, દાવાની પ્રક્રિયા અને ફરિયાદ નિવારણ પદ્ધતિ વિશે પણ જાણ કરવામાં આવશે. પરિપત્ર અનુસાર, વીમા કંપની, મધ્યસ્થી અને એજન્ટે બદલાયેલ CICની વિગતો પોલિસીધારકોને મોકલવાની રહેશે.
