હમાસ-ઈઝરાયેલ યુદ્ધમાં યુદ્ધવિરામને લઈને સંયુક્ત રાષ્ટ્રએ મંગળવારે (24 ઓક્ટોબર) એક ઉચ્ચ સ્તરીય બેઠક યોજી હતી અને બંને પક્ષોને યુદ્ધ રોકવા માટે વિનંતી કરી હતી. જોકે ઈઝરાયેલે આ વિનંતીને ફગાવી દીધી હતી. યુએનમાં ઇઝરાયલના રાજદૂત ગિલાડ એર્ડને કહ્યું કે યુએન સેક્રેટરી જનરલ યુએનનું નેતૃત્વ કરવા માટે યોગ્ય નથી કારણ કે તેઓ ‘બાળકો, મહિલાઓ અને વૃદ્ધોની સામૂહિક હત્યાના અભિયાન’ માટે કોઈ સમજણ બતાવતા નથી.
ઇઝરાયલના વિદેશ મંત્રી એલી કોહેને કહ્યું કે, “તમે તમારા અસ્તિત્વને નષ્ટ કરવાના શપથ લેનાર વ્યક્તિ સાથે યુદ્ધવિરામ માટે કેવી રીતે સંમત થશો?”
અમેરિકી રાષ્ટ્રપતિએ શું કહ્યું?
અમેરિકી રાષ્ટ્રપતિને પૂછવામાં આવ્યું કે શું અમેરિકા ઈઝરાયેલ પર ગાઝામાં ગ્રાઉન્ડ ઓપરેશનમાં વિલંબ કરવા દબાણ કરી રહ્યું છે? આના જવાબમાં તેણે કહ્યું કે ઈઝરાયેલ પોતાના નિર્ણય જાતે લઈ શકે છે.
‘ગ્રાઉન્ડ ઓપરેશન માટે તૈયાર’
IDF ચીફ ઓફ સ્ટાફ, લેફ્ટનન્ટ જનરલ હરઝી હલેવીએ કહ્યું, “હું સ્પષ્ટ થવા માંગુ છું, અમે ગ્રાઉન્ડ ઓપરેશન માટે તૈયાર છીએ.” બુધવારે, ઇઝરાયેલની સેનાએ જણાવ્યું હતું કે સીરિયાથી ઇઝરાયેલ તરફ રોકેટ છોડવામાં આવ્યા બાદ તેના જેટે સીરિયન આર્મી ઇન્ફ્રાસ્ટ્રક્ચર અને મોર્ટાર લોન્ચર પર હુમલો કર્યો હતો.
