સોમવારની મોડી રાતથી મંગળવાર સવાર સુધી UAEના ઘણા ભાગોમાં ભારે વરસાદ ચાલુ રહ્યો હતો, ત્યારબાદ સ્થિતિ ગંભીર જોવા મળી હતી. રાજધાની દુબઈમાં ભારે વરસાદ બાદ પૂર જેવી સ્થિતિ સર્જાઈ હતી. દુબઈની શેરીઓ, ઘરો અને મોલમાં પાણી ભરાઈ ગયા હતા. ભારે વરસાદ વચ્ચે સત્તાવાળાઓએ ચેતવણી જાહેર કરી છે. રાષ્ટ્રીય હવામાન કેન્દ્રે દેશના ઘણા વિસ્તારોમાં રેડ એલર્ટ જાહેર કર્યું છે અને લોકોને ‘સતર્ક’ રહેવાની અપીલ કરી છે. બુધવારે સાંજે 6 વાગ્યા સુધી એલર્ટ જારી કરવામાં આવ્યું છે.
વરસાદનો પાયમાલ
દુબઈ ઉપરાંત ઓમાનમાં પણ ભારે વરસાદે તબાહી મચાવી છે. અહીં વરસાદના કારણે 18 લોકોના મોત થયા છે. આ સિવાય અબુ ધાબી અને અલ આઈન જેવા શહેરોમાં ભારે વરસાદ બાદ પૂર જેવી સ્થિતિ સર્જાઈ છે. ઘણા મોટા રાજમાર્ગો અને એરપોર્ટ પર પાણી ભરાઈ ગયા છે, જેના કારણે હવાઈ અવરજવર પર ખરાબ અસર પડી છે. ભારે વરસાદને કારણે ઘણા લોકો લાપતા પણ છે.
લોકોને આપવામાં આવેલી સલાહ
ખલીજ ટાઈમ્સ અનુસાર, રાષ્ટ્રીય હવામાન કેન્દ્રએ બુધવાર સુધી દુબઈ, અબુ ધાબી અને શારજાહ સહિત ઘણા વિસ્તારોમાં ભારે વરસાદની આગાહી કરી છે. રાષ્ટ્રીય હવામાન કેન્દ્રમાં કામ કરતા અહેમદ હબીબે જણાવ્યું હતું કે, “દુબઈ, અબુ ધાબી, શારજાહ અને અમીરાતના અન્ય સ્થળોએ માત્ર ભારે વરસાદ જ નહીં પરંતુ કરા પડવાની પણ સંભાવના છે.” લોકોને પૂરગ્રસ્ત વિસ્તારોથી દૂર, સુરક્ષિત અને ઊંચા સ્થળોએ તેમના વાહનો પાર્ક કરવાની સલાહ આપવામાં આવી છે. વરસાદના કારણે લોકોને મસ્જિદને બદલે ઘરે જ નમાઝ અદા કરવા કહેવામાં આવ્યું છે. અધિકારીઓએ જરૂરી હોય ત્યારે જ ઘરની બહાર જવાની સલાહ આપી છે.
પાણી જ પાણી, વરસાદે મુશ્કેલી વધારી
ભારે વરસાદ અને તોફાનને કારણે દુબઈ ઈન્ટરનેશનલ એરપોર્ટ પર પાણી દેખાઈ રહ્યું હતું. 50 થી વધુ ફ્લાઈટો પણ રદ કરવામાં આવી છે. દુબઈ એરપોર્ટના પ્રવક્તાએ કહ્યું કે આ સમસ્યા ગંભીર તોફાનના કારણે થઈ હતી પરંતુ હવે તે રિકવરી મોડમાં છે. દુબઈ મેટ્રોની રેડ લાઈન સેવાઓ વરસાદને કારણે ખોરવાઈ ગઈ છે. ઘણા મેટ્રો સ્ટેશનો પર પાણી ભરાઈ ગયા હતા. દુબઈથી અબુ ધાબી, શારજાહ અને અજમાનની બસ સેવા પણ રોકી દેવામાં આવી હતી. સ્થિતિ એવી બની કે મોટા શોપિંગ સેન્ટરો, દુબઈ મોલ અને મોલ ઓફ અમીરાતમાં પણ પાણી ભરાઈ ગયા.
શાળા બંધ
તમને જણાવી દઈએ કે UAE એક રણપ્રદેશ છે જ્યાં વરસાદ એક અસામાન્ય ઘટના છે. દરમિયાન ભારે વરસાદને કારણે સમગ્ર UAEમાં શાળાઓ બંધ કરી દેવામાં આવી છે. કરા સાથે વાવાઝોડાની પણ શક્યતા છે. યુએઈના કેટલાક વિસ્તારોમાં 24-કલાકના સમયગાળામાં 80 મિલીમીટર (3.2 ઇંચ) કરતાં વધુ વરસાદ નોંધાયો છે, જે વાર્ષિક સરેરાશ કરતાં વધુ છે.
