IPL 2024: IPL 2024 ની છઠ્ઠી મેચ બેંગલુરુના એમ ચિન્નાસ્વામી સ્ટેડિયમમાં RCB અને પંજાબ કિંગ્સની ટીમો વચ્ચે રમાઈ હતી. આઈપીએલના ઈતિહાસમાં આ પહેલીવાર છે જ્યારે હોળીના દિવસે કોઈ મેચ રમાઈ હતી અને આ ખાસ અવસર પર રોયલ ચેલેન્જર્સ બેંગ્લોરનો વિજય થયો હતો. આ મેચમાં વિરાટ કોહલી પોતાની ટીમની જીતનો હીરો રહ્યો હતો.
RCB હોળી પર IPL મેચ જીતનારી પ્રથમ ટીમ બની છે
આ મેચમાં પંજાબ કિંગ્સે રોયલ ચેલેન્જર્સ બેંગ્લોર સામે મેચ જીતવા માટે 177 રનનો ટાર્ગેટ આપ્યો હતો. રોયલ ચેલેન્જર્સ બેંગ્લોરે આ ટાર્ગેટ 19.2 ઓવરમાં હાંસલ કરી લીધો હતો. વિરાટે RCB માટે સૌથી મોટી ઇનિંગ રમી હતી. વિરાટે 49 બોલમાં 77 રન બનાવ્યા હતા. આ પછી દિનેશ કાર્તિકે 10 બોલમાં અણનમ 28 રન બનાવીને મેચ પૂરી કરી હતી. દિનેશ કાર્તિક ઉપરાંત મહિપાલ લોમરોરે પણ 8 બોલમાં અણનમ 17 રન બનાવ્યા હતા.
આરસીબીના બોલરોએ શાનદાર પ્રદર્શન કર્યું હતું
આ પહેલા પંજાબ કિંગ્સે પ્રથમ બેટિંગ કરતા 20 ઓવરમાં 6 વિકેટ ગુમાવીને 176 રન બનાવ્યા હતા. પંજાબ કિંગ્સ તરફથી કેપ્ટન શિખર ધવને સૌથી વધુ 45 રન બનાવ્યા હતા. જ્યારે જીતેશ શર્માએ 27 રનની ઇનિંગ રમી હતી. આ સિવાય શશાંક સિંહ 8 બોલમાં 21 રન બનાવીને અણનમ રહ્યો હતો. બીજી તરફ આરસીબી તરફથી મોહમ્મદ સિરાજ-ગ્લેન મેક્સવેલે 2-2 વિકેટ લીધી હતી. અલઝારી જોસેફ અને યશ દયાલને પણ 1-1 વિકેટ મળી હતી.
IPL 2024 પોઈન્ટ ટેબલની સ્થિતિ
આ જીત સાથે રોયલ ચેલેન્જર્સ બેંગ્લોરની ટીમ પોઈન્ટ ટેબલમાં છઠ્ઠા સ્થાને પહોંચી ગઈ છે. આરસીબીએ અત્યાર સુધી 2માંથી એક મેચ જીતી છે. આ સાથે જ પંજાબ કિંગ્સ આ હાર સાથે પાંચમા સ્થાને આવી ગઈ છે. બીજી તરફ રાજસ્થાનની ટીમ નંબર વન પર યથાવત છે.
