વર્લ્ડ હેલ્થ ઓર્ગેનાઈઝેશન (WHO) એ દક્ષિણ-પૂર્વ એશિયાના દેશોને કોરોના અને તેના નવા પ્રકારો JN.1 અને ઈન્ફલ્યુએન્ઝા સહિતના શ્વસન રોગોના વધતા જતા કેસોને ધ્યાનમાં રાખીને સર્વેલન્સ સિસ્ટમને મજબૂત કરવા વિનંતી કરી છે. WHOએ પણ લોકોને સાવચેતીનાં પગલાં લેવાની અપીલ કરી છે. ભારતમાં રવિવારે કોરોનાના 656 નવા કેસ નોંધાયા હતા. તેના કારણે સક્રિય કેસની સંખ્યા વધીને 3,742 થઈ ગઈ છે.
કેરળમાં સૌથી વધુ 128 કેસ નોંધાયા છે
કેરળમાં સૌથી વધુ 128 કેસ નોંધાયા છે. મહારાષ્ટ્રમાંથી 50 કેસ નોંધાયા હતા, જેમાંથી નવ કેસ JN.1 વેરિઅન્ટના છે. આરોગ્ય મંત્રાલયના જણાવ્યા અનુસાર કેરળમાં છેલ્લા 24 કલાકમાં રોગચાળાને કારણે એક વ્યક્તિનું મોત થયું છે. ડબ્લ્યુએચઓ દક્ષિણ-પૂર્વ એશિયાના પ્રાદેશિક નિર્દેશક ડૉ. પૂનમ ખેતરપાલ સિંહે જણાવ્યું હતું કે, કોરોના વાયરસ વૈશ્વિક સ્તરે તમામ દેશોમાં ફેલાતો, પરિવર્તિત અને ફરતો રહે છે.
જાહેર આરોગ્ય જોખમ ઓછું છે
વર્તમાન પુરાવા સૂચવે છે કે ZN.1 દ્વારા જાહેર આરોગ્ય જોખમ ઓછું છે. તદનુસાર, આપણે આપણો પ્રતિભાવ નક્કી કરવો જોઈએ અને સતત નજર રાખવી જોઈએ. તેમણે કહ્યું, આ માટે દેશોએ મોનિટરિંગ સિસ્ટમને મજબૂત કરવી પડશે અને ડેટાની વહેંચણી સુનિશ્ચિત કરવી પડશે.
WHO એ JN.1 ને તેના ઝડપી વૈશ્વિક પ્રસાર પછી દેખરેખ હેઠળ રાખવા માટેના પ્રકાર તરીકે વર્ગીકૃત કર્યું છે. તાજેતરના અઠવાડિયામાં, ઘણા દેશોમાં JN.1 ના કેસ નોંધાયા છે અને વૈશ્વિક સ્તરે તેનો ફેલાવો ઝડપથી વધી રહ્યો છે. દરમિયાન, મહારાષ્ટ્રના પ્રધાન સંજય બન્સોડેએ આરોગ્ય અધિકારીઓને સરકારી હોસ્પિટલોમાં વેન્ટિલેટર, ઓક્સિજન સિલિન્ડર અને અન્ય આવશ્યક સાધનોની ઉપલબ્ધતા સુનિશ્ચિત કરવાનો નિર્દેશ આપ્યો છે.
