8 માર્ચ, 2023… આ એ તારીખ છે જ્યારે પાકિસ્તાનમાં રનનો ભૂકંપ આવ્યો હતો. જ્યારે ઈંગ્લેન્ડના ઓપનરે પાકિસ્તાન સુપર લીગની મેચમાં તબાહી મચાવી હતી. અમે વાત કરી રહ્યા છીએ જેસન રોયની, જેણે પીએસએલની 8મી સીઝનમાં માત્ર 44 બોલમાં સદી ફટકારીને પોતાની ટીમને જીત અપાવી હતી. હવે આ જ જેસન રોય IPL 2023માં રમતા જોવા મળશે. કોલકાતા નાઈટ રાઈડર્સ દ્વારા જેસન રોયને પોતાની ટીમમાં સામેલ કરવામાં આવ્યો છે.
જણાવી દઈએ કે IPL ઓક્શનમાં જેસન રોયને કોઈ ટીમે ખરીદ્યો ન હતો, પરંતુ આ ખેલાડીને હવે KKRમાં એન્ટ્રી મળી ગઈ છે. વાસ્તવમાં કોલકાતા નાઈટ રાઈડર્સના ઓલરાઉન્ડર શાકિબ અલ હસને આઈપીએલની આ સિઝનમાં નહીં રમવાનો નિર્ણય લીધો છે. આ પછી એક મોટો નિર્ણય લેતા KKR એ જેસન રોય સાથે કરાર કર્યો છે. જેસન રોયને 2.8 કરોડમાં ખરીદ્યો છે.
જેસન રોયે PSLમાં તબાહી મચાવી હતી
તમને જણાવી દઈએ કે 8 માર્ચે જેસન રોયે રાવલપિંડીની પીચ પર પેશાવર જાલ્મી વિરુદ્ધ શાનદાર સદી ફટકારી હતી. રોય ક્વેટા ગ્લેડીયેટર્સ તરફથી રમી રહ્યો હતો અને ઓપનરે 63 બોલમાં 145 રન બનાવ્યા હતા. રોયનો સ્ટ્રાઈક રેટ 230થી વધુ હતો અને તેના બેટમાંથી 5 છગ્ગા અને 20 ચોગ્ગા નીકળ્યા હતા. તેની તોફાની ઇનિંગ્સના આધારે ક્વેટાએ 10 બોલ પહેલા જ 241 રનનો ટાર્ગેટ મેળવી લીધો હતો.
