કતાર જેલમાં બંધ પૂર્વ ભારતીય મરીન અંગે રાહતના સમાચાર સામે આવ્યા છે. અહેવાલો અનુસાર, ભારતીય નૌકાદળના ભૂતપૂર્વ અધિકારીઓને આપવામાં આવેલી મૃત્યુદંડની સજા સામે ભારતની અપીલ સ્વીકારવામાં આવી છે. વિદેશ મંત્રાલયના પ્રવક્તા અરિંદમ બાગચીએ તાજેતરમાં જણાવ્યું હતું કે ભારતીય દૂતાવાસને અટકાયતમાં લેવાયેલા ભારતીયો માટે વધુ એક કોન્સ્યુલર એક્સેસ મળી છે. તેમણે કહ્યું છે કે ભારત નાગરિકોને તમામ કાયદાકીય અને કોન્સ્યુલર સમર્થન આપવાનું ચાલુ રાખશે.
મૃત્યુદંડની સજા આપવામાં આવી હતી
ગયા મહિને, કતારની અદાલતે 8 ભૂતપૂર્વ ભારતીય મરીનને મૃત્યુદંડની સજા ફટકારી હતી. ભારતના આ નાગરિકો છેલ્લા એક વર્ષથી કતારની જેલમાં બંધ હતા. ભારત સરકારે કતારની અદાલત દ્વારા મૃત્યુદંડની જાહેરાત પર આઘાત વ્યક્ત કર્યો હતો અને તેના નાગરિકોની મુક્તિ સુનિશ્ચિત કરવા માટે તમામ ઉપલબ્ધ કાયદાકીય વિકલ્પોની શોધ કરવાનું વચન આપ્યું હતું.
શું છે આરોપ?
ગયા વર્ષે ઓગસ્ટમાં કતારમાં ભારતીય નૌકાદળના આઠ ભૂતપૂર્વ અધિકારીઓની ધરપકડ કરવામાં આવી હતી. મીડિયા રિપોર્ટ્સ અનુસાર, આ અધિકારીઓ કતારની ખાનગી કંપની અલ દહરા સાથે કામ કરતા હતા. આ ભારતીય નાગરિકોની કથિત રીતે જાસૂસીના કેસમાં ધરપકડ કરવામાં આવી હતી. અત્યાર સુધી ન તો કતારી સત્તાવાળાઓએ અને ન તો નવી દિલ્હીએ ભારતીય નાગરિકો સામેના આરોપો જાહેર કર્યા છે.
દોષરહિત કાર્યકાળ સાથે અધિકારીઓ
રિપોર્ટ અનુસાર, આ તમામ ભૂતપૂર્વ અધિકારીઓએ 20 વર્ષ સુધી નેવીમાં સેવા આપી છે અને તેમનો કાર્યકાળ દોષરહિત હતો. આ અધિકારીઓએ નૌકાદળમાં ટ્રેનર સહિત અનેક મહત્વની જગ્યાઓ પર કામ કર્યું હતું. તમને જણાવી દઈએ કે અલ દહરા કંપનીએ મે મહિનામાં દોહામાં તેનું કામકાજ બંધ કરી દીધું હતું અને ત્યાં કામ કરતા તમામ લોકો પોતાના ઘરે પરત ફર્યા છે.
