ગુજરાતના ગોધરામાં સાબરમતી એક્સપ્રેસમાં આગચંપી કરવાના કેસમાં આઠ દોષિતોને સુપ્રીમ કોર્ટમાંથી મોટી રાહત મળી છે. સુપ્રીમ કોર્ટે આઠ દોષિતોને જામીન આપ્યા છે. આઠ દોષિતો આજીવન કેદની સજા ભોગવી રહ્યા હતા. કોર્ટે આ દોષિતોને 17-18 વર્ષ જેલમાં ગાળવાના આધારે જામીન આપ્યા હતા. આ દોષિતોને નીચલી અદાલત અને હાઈકોર્ટે આજીવન કેદની સજા ફટકારી હતી.
ચાર દોષિતોના જામીન નામંજૂર
આ સાથે સુપ્રીમ કોર્ટે ચારેય દોષિતોને રાહત આપવાનો ઇનકાર કરી દીધો હતો. ચારેય દોષિતોને ટ્રાયલ કોર્ટે ફાંસીની સજા ફટકારી હતી. કોર્ટે સુનાવણી દરમિયાન કહ્યું કે મૃત્યુદંડની સજા પામેલા ચાર દોષિતોને છોડીને બાકીના દોષિતોને જામીન મળી શકે છે.
બોગીને બહારથી લોક કરી આગ લગાડવામાં આવીઃ તુષાર મહેતા
ગુજરાત સરકાર તરફથી સોલિસિટર જનરલ તુષાર મહેતાએ રજૂઆત કરી હતી કે બોગીને બહારથી સળગાવવામાં આવી હતી. આગની ઘટનામાં મહિલાઓ અને બાળકો સહિત 59 લોકો માર્યા ગયા હતા. તુષાર મહેતાએ કહ્યું હતું કે કેટલાક લોકો એવું કહી રહ્યા છે કે તેમની ભૂમિકા માત્ર પથ્થરબાજી સુધી સીમિત હતી. પરંતુ, જ્યારે તમે બોક્સને બહારથી લોક કરો છો, તેને આગ લગાડો છો અને પછી પથ્થરમારો કરો છો, તે માત્ર પથ્થરમારો નથી.
ફારૂકને જામીન મળી ગયા છે
સુપ્રીમ કોર્ટે આ કેસમાં ફારુકને પહેલા જ જામીન આપી દીધા છે. ગયા વર્ષે 15 ડિસેમ્બરે કોર્ટે આજીવન કેદની સજા ભોગવી રહેલા ફારૂકને જામીન આપી દીધા હતા અને કહ્યું હતું કે તે 17 વર્ષથી જેલમાં હતો. જોકે, સોલિસિટર જનરલે ફારુકને જામીન આપવાનો વિરોધ કર્યો હતો.
