શહેરના કાપોદ્રા પોલીસ સ્ટેશન હદ વિસ્તારમાં ઓનલાઈન યંત્રના નામે ચાલતા જુગારધામનો પર્દાફાશ થયો છે. પોલીસ દ્વારા જુગારધામ પર દરોડા પાડીને એક લાખ કરતાં વધુની રોકડ રકમ સાથે 14 જુગારીને ઝડપી પાડવામાં આવ્યા છે. ઓનલાઈન સોફ્ટવેરની મદદથી યંત્ર વિજેતાને એકના બદલામાં નવ ગણી રકમ ચૂકવીને આ જુગાર રમાડવામાં આવતો હતો.જણાવી દઈએ કે પોલીસે મોબાઈલ, ટીવી, રીમોટ, કીબોડ, માઉસ, મીની કીબોડ, બારકોડ સહિતનો મુદ્દામાલ પણ જપ્ત કર્યો છે.
આ બનાવની વિગતો જોઈએ તો,સુરતની કાપોદ્રા પોલીસને અલગ અલગ યંત્રની આડમાં ચાલતા જુગાર ધામનો પર્દાફાશ કરવામાં મોટી સફળતા મળી છે. કાપોદ્રા પોલીસે બાતમીના આધારે ગાયત્રી સોસાયટીમાં આવેલ બિલ્ડીંગ નંબર 114માં ચાલતી એક દુકાનમાં દરોડા પાડ્યા હતા અને તે સમયે દુકાનમાં ઓનલાઇન સોફ્ટવેરની મદદથી યંત્ર વિજેતાઓને એકના બદલામાં નવ ગણા રૂપિયા આપવાનો જુગાર ચાલતો હતો.
ઓનેસ્ટ ટુ ઓનલાઇન માર્કેટિંગ આડમાં જુગારધામ
કાપોદ્રા પોલીસ દ્વારા આ જુગારધામ પર દરોડો કરીને 14 જુગારીની ધરપકડ કરવામાં આવી છે. અમિત ભટ્ટ કે જે ઓનેસ્ટ ટુ ઓનલાઇન માર્કેટિંગ એજન્સીના નામથી જુગારધામ ચલાવતા ઈસમને વોન્ટેડ જાહેર કરવામાં આવ્યો છે.
ઓપરેટરો રાખીને જુગાર રમાડતા
પોલીસ તપાસમાં સામે આવ્યું હતું કે આરોપી કુલદીપસિંહ ગોહિલ તેમજ ઓનેસ્ટ ઓનલાઈન માર્કેટિંગ એજન્સીના માધ્યમથી આ જુગારધામ ચલાવનાર અમિત ભટ્ટ ભાડાની દુકાનમાં ઓપરેટરો રાખીને પોતાના આર્થિક લાભ માટે આર્થિક યંત્રના નામે દર પાંચ મિનિટે ઓનલાઈન સોફ્ટવેરથી વિજેતા વ્યક્તિને એકના બદલામાં નવ ગણી રકમ ચૂકવીને જુગાર રમાડતા હતા.
2,26,657 રૂપિયાનો મુદ્દામાલ જપ્ત
આ ઉપરાંત વિજેતા સિવાયના ગ્રાહકો પાસેથી તેઓ રોકડ રકમ મેળવીને લક પર જુગારનો અખાડો ચલાવતા હતા. પોલીસ આ જગ્યા પર દરોડા પાડીને 1,04,809 રૂપિયા રોકડા 15 મોબાઇલ, ટીવી, રીમોટ, કીબોર્ડ, માઉસ, મીની સીપીયુ, બારકોડ સ્કેનર, લાઈટ પ્રિન્ટર, રાઉટર તેમજ અલગ અલગ યંત્રના બારકોડ તેમજ ચિઠ્ઠીઓ સહિત કુલ 2,26,657 રૂપિયાનો મુદ્દા માલ જપ્ત કર્યો છે.
