તાલિબાન શાસિત અફઘાનિસ્તાન એરફોર્સનું એક હેલિકોપ્ટર પેટ્રોલિંગ દરમિયાન ક્રેશ થયું હતું. આ અકસ્માતમાં બે લોકોના મોત થયા છે. અફઘાનિસ્તાનના સંરક્ષણ વિભાગના જણાવ્યા અનુસાર, હેલિકોપ્ટર ઉત્તરીય સમંગાન પ્રાંત નજીક પેટ્રોલિંગ દરમિયાન ક્રેશ થયું હતું. જેમાં હેલિકોપ્ટરમાં સવાર બે પાઈલટના મોત થયા હતા.
ઘટનાની પુષ્ટિ કરતા તાલિબાનના સંરક્ષણ વિભાગે જણાવ્યું હતું કે વાયુસેનાનું MD-530 હેલિકોપ્ટર હાઇ-વોલ્ટેજ ઇલેક્ટ્રિક પોલ સાથે અથડાયું હતું. જેના કારણે હેલિકોપ્ટરમાં કોઈ ટેકનિકલ ખામી સર્જાઈ હતી અને તે ક્રેશ થઈને પડી ગયું હતું. આ અકસ્માતમાં બંને પાયલોટના મોત થયા હતા.
ટેકનિકલ ખામીના કારણે અકસ્માત
મળતી માહિતી મુજબ, આ દુર્ઘટના સમંગાન પ્રાંતના ખુલ્મ જિલ્લામાં બની હતી. અફઘાનિસ્તાનમાં તાલિબાનના માહિતી વિભાગના વડાએ પણ અકસ્માતની પુષ્ટિ કરી છે. સ્થાનિક મીડિયાના અહેવાલમાં કહેવામાં આવી રહ્યું છે કે આ પ્રથમ સૈન્ય હેલિકોપ્ટર દુર્ઘટના નથી. આ પહેલા પણ ટેક્નિકલ ખામીના કારણે અનેક હેલિકોપ્ટર અકસ્માતો થયા છે. આ દુર્ઘટનાઓમાં ઘણા પાયલોટના મોત થયા છે.
ઓગસ્ટ 2021માં અફઘાનિસ્તાન પર તાલિબાનોના કબજા બાદથી, વાયુસેનાના ઘણા હેલિકોપ્ટર અજ્ઞાત કારણોસર અકસ્માતનો ભોગ બન્યા છે. આ દુર્ઘટનાઓની તપાસમાં ટેકનિકલ ખામીનું કારણ સ્પષ્ટ કરવામાં આવ્યું નથી.આ પહેલા ગયા વર્ષે 10 સપ્ટેમ્બરે કાબુલમાં સૈન્ય તાલીમ દરમિયાન યુએસ નિર્મિત બ્લેક હોક હેલિકોપ્ટર ક્રેશ થયું હતું. ત્યારબાદ અફઘાનિસ્તાનના સંરક્ષણ મંત્રાલયે જણાવ્યું હતું કે અકસ્માતમાં ત્રણ લોકોના મોત થયા છે.
તાલિબાને ઘણા અમેરિકન હેલિકોપ્ટર કબજે કર્યા
તાલિબાને અફઘાનિસ્તાન પર કબજો મેળવ્યા પછી, નાટો લશ્કરી સંગઠનો અને યુએસ દળોએ દેશ છોડી દીધો. દાવો કરવામાં આવે છે કે આ સમય દરમિયાન અમેરિકાને અફઘાનિસ્તાનમાં તેના ઘણા યુદ્ધ શસ્ત્રો અને સૈન્ય સાધનો છોડવા પડ્યા હતા.
તાલિબાન સરકારના કબજામાં કેટલા અમેરિકન હેલિકોપ્ટર છે તે અંગે કોઈ સત્તાવાર આંકડો જાહેર કરવામાં આવ્યો નથી. ગયા વર્ષે તાલિબાને અફઘાનિસ્તાન પર કબજો મેળવ્યા પછી યુએસ સમર્થિત સરકાર ઓગસ્ટમાં પડી ગઈ હતી. આ દરમિયાન ઘણા અફઘાન પાયલટ મધ્ય એશિયાના દેશોમાં ગયા હતા.
