લોંગયુ કાઉન્ટી, ઝેજિયાંગ પ્રાંત, ચીનમાં 24 માનવસર્જિત સેન્ડસ્ટોન ગુફાઓ છે, જે એટલી સારી રીતે સચવાયેલી છે કે જાણે તાજેતરમાં જ બનાવવામાં આવી હોય. આ ગુફાઓ માનવ ઇતિહાસની કેટલીક અદભૂત ભૂગર્ભ રચનાઓ છે, જેનું રહસ્ય ઓછામાં ઓછું 2000 વર્ષ જૂનું છે, જેનું રહસ્ય નિષ્ણાતો પણ આજ સુધી ઉકેલી શક્યા નથી.
આ ગુફાઓની શોધ ક્યારે થઈઃ રિપોર્ટ અનુસાર, આ ગુફાઓની શોધ 1992માં થઈ હતી. લોંગયુ કાઉન્ટીમાં તળાવમાંથી પાણી કાઢતી વખતે, સ્થાનિક ખેડૂતોએ ભૂગર્ભ માળખાં જોયાં. જ્યારે અહીં ખોદકામ કરવામાં આવ્યું ત્યારે કુલ 24 ગુફાઓ મળી આવી હતી, જે હવે લોંગયુ ગુફાઓ અથવા ઝેજિયાંગ સ્ટોન ચેમ્બર તરીકે ઓળખાય છે.
ગુફાઓનું કદ આશ્ચર્યજનક છે
આ પ્રાચીન ગુફાઓનું કદ આશ્ચર્યજનક છે, દરેક ગુફામાં સરેરાશ ફ્લોર એરિયા 1000 ચોરસ મીટર છે અને છતની ઊંચાઈ 30 મીટર સુધી પહોંચે છે. તમામ ગુફાઓનો કુલ વિસ્તાર 30,000 ચોરસ મીટરથી વધુ છે. ગુફાઓ કુદરતી નથી, કારણ કે તેમની દિવાલો પર છીણીના નિશાન સ્પષ્ટપણે જોઈ શકાય છે.
તમને જાણીને નવાઈ લાગશે કે દિવાલો પર છીણી પણ એવી રીતે કરવામાં આવી હતી કે સમાંતર ગ્રુવ્સની સમાન પેટર્ન છોડી શકાય. આ નિશાનો નજીકના મ્યુઝિયમમાં રાખવામાં આવેલા માટીના વાસણો પર મળેલા નિશાનો જેવા જ છે, જે 500 અને 800 બીસી વચ્ચેના છે. સીડીઓ, થાંભલાઓ, ઉત્કૃષ્ટ રીતે કોતરેલી આકૃતિઓ પણ છે.
લોંગ્યુ ગુફાઓનું રહસ્ય
કેટલાક અનુમાન મુજબ ગુફાઓ 2000 વર્ષ પહેલાં ખોદવામાં આવી હતી, સંભવતઃ 200 બીસીમાં. આશરે અંદાજ સૂચવે છે કે ગુફાઓ બનાવવા માટે આશરે 10 લાખ ઘન મીટર ખડક દૂર કરવામાં આવ્યો હતો. જો કે આટલા મોટા પ્રોજેક્ટનો કોઈ ઐતિહાસિક રેકોર્ડ નથી. તેમને કોણે, ક્યારે અને શા માટે બનાવ્યા? આ પ્રશ્નો 2000 વર્ષોથી રહસ્ય રહ્યા છે, તેથી તે વિશ્વની સૌથી રસપ્રદ પુરાતત્વીય કોયડાઓમાંની એક છે.
