X ની ટીવી એપ ટૂંક સમયમાં લોન્ચ થવા જઈ રહી છે. આ માહિતી એક્સના માલિક એલન મસ્કે પોતે આપી છે. X અગાઉ Twitter તરીકે ઓળખાતું હતું. એલન મસ્કે X TV એપ માટે બે મોટી કંપનીઓ સાથે ભાગીદારી કરી છે. X હવે YouTube સાથે સ્પર્ધા કરવા જઈ રહ્યું છે. X TV એપનું અપડેટ આવતા સપ્તાહથી બહાર પાડવામાં આવશે.
રિપોર્ટ અનુસાર Xની ટીવી એપ યુટ્યુબ ટીવી એપ જેવી જ લાગે છે. એલન મસ્ક ટીવી એપ દ્વારા Xના વીડિયો ટીવી પર મોકલવાની યોજના ધરાવે છે. આને રેવન્યુ મોડલનો એક ભાગ પણ કહી શકાય.
એલન મસ્ક ધીમે ધીમે X વીડિઓ પ્લેટફોર્મ તરફ આગળ વધી રહ્યો છે. થોડા દિવસો પહેલા જ તેણે એક એક્સક્લુઝિવ શો માટે એક વિદેશી ન્યૂઝ ચેનલના પ્રખ્યાત એન્કર સાથે ભાગીદારી કરી છે. આ સિવાય યુટ્યુબર મિસ્ટર બીસ્ટ, તેના એક વીડિયોમાંથી X થી $2,50,000ની કમાણી કરી છે, ત્યારબાદ X કમાણીના સંદર્ભમાં કન્ટેન્ટ ક્રિએટર્સમાં ખુબ જ લોકપ્રિય બની ગયું છે.
YouTube સાથે સ્પર્ધા કરવી સરળ નથી
ભલે એલન મસ્કે YouTube સાથે સ્પર્ધા કરવા X TV એપ લોન્ચ કરી હોય, પરંતુ આ સ્પર્ધા એટલી સરળ નથી. તમને વિશ્વના તમામ સ્માર્ટ ટીવીમાં ડિફોલ્ટ રૂપે YouTube એપ્લિકેશન મળશે. આનું મુખ્ય કારણ એ છે કે અન્ય ઘણા ખેલાડીઓ બજારમાં પ્રવેશ્યા પછી પણ ગૂગલ ટીવી ઓપરેટિંગ સિસ્ટમ પર પ્રભુત્વ જાળવી રાખે છે.
