અમેરિકી રાષ્ટ્રપતિ જો બિડેને આર્ટિફિશિયલ ઈન્ટેલિજન્સ સાથે સંકળાયેલા જોખમો અને સુરક્ષા પગલાં અંગે ચર્ચા કરવા ટોચની કંપનીઓ સાથે બેઠક યોજી હતી. આ મીટિંગમાં ગૂગલના સુંદર પિચાઈ અને માઈક્રોસોફ્ટના સત્ય નડેલા પણ હાજર હતા.
વાઇસ પ્રેસિડેન્ટ કમલા હેરિસની અધ્યક્ષતામાં યોજાયેલી વ્હાઇટ હાઉસની બેઠકમાં અગ્રણી સ્ટાર્ટ-અપ્સ ઓપનએઆઇ અને એન્થ્રોપિકના સીઇઓએ પણ હાજરી આપી હતી. બિડેન એડમિનિસ્ટ્રેશન ચીફ ઓફ સ્ટાફ જેફ ઝિએન્ટ્સ, રાષ્ટ્રીય સુરક્ષા સલાહકાર જેક સુલિવાન, નેશનલ ઇકોનોમિક કાઉન્સિલના ડિરેક્ટર લાઇલ બ્રેનાર્ડ અને વાણિજ્ય સચિવ જીના રેમોન્ડો પણ હાજરીમાં હતા.
140 મિલિયન ડોલરનું રોકાણ, AI સંશોધન સંસ્થાની સ્થાપના કરવામાં આવશે
સમાચાર અનુસાર, સુંદર પિચાઈ અને સત્ય નડેલા સવારે 11 વાગ્યે મીટિંગ માટે પહોંચ્યા હતા. જો કે, બંનેએ આ અંગે મીડિયાને કોઈ ટિપ્પણી કરી ન હતી. ખાસ વાત એ છે કે મીટિંગ પહેલા વ્હાઇટ હાઉસ દ્વારા AI એન્ટરપ્રાઇઝીસ સ્થાપવા માટે $140 મિલિયનના નવા રોકાણની જાહેરાત કરવામાં આવી હતી.
આ સાથે નેશનલ સાયન્સ ફાઉન્ડેશનને અદ્યતન બનાવવામાં આવશે, આ ઉપરાંત સાત નવી નેશનલ આર્ટિફિશિયલ ઈન્ટેલિજન્સ રિસર્ચ ઈન્સ્ટિટ્યૂટ પણ બનાવવામાં આવશે.
મીટિંગમાં, રાષ્ટ્રપતિ બિડેન એઆઈ વિશે સ્પષ્ટ હતા. તેમણે કહ્યું કે સમાજ, સુરક્ષા અને અર્થવ્યવસ્થાની સુરક્ષા આપણા માટે સૌથી મહત્વપૂર્ણ છે.
આર્ટિફિશિયલ ઇન્ટેલિજન્સ પર નવો કાયદો
સાથે જ વાઇસ પ્રેસિડેન્ટ હેરિસે પોતાના નિવેદનમાં કહ્યું કે ટેક્નોલોજી જીવનને બહેતર બનાવવામાં મદદ કરે છે, પરંતુ તે સુરક્ષા, ગોપનીયતા અને નાગરિક અધિકારો માટે પણ ખતરો પેદા કરી શકે છે. આ દરમિયાન, તેમણે મીટિંગમાં હાજર ટોચની કંપનીઓના એક્ઝિક્યુટિવ અધિકારીઓને કહ્યું કે તેમની પાસે તેમના AI ઉત્પાદનોની સુરક્ષા સુનિશ્ચિત કરવાની મોટી જવાબદારી છે.
આ સિવાય પ્રશાસન આર્ટિફિશિયલ ઈન્ટેલિજન્સ અંગે નવા કાયદા બનાવવા પર પણ વિચાર કરી રહ્યું છે.
કમલા હેરિસે એમ પણ કહ્યું કે સરકાર, ખાનગી કંપનીઓ અને સમાજે સાથે મળીને આ પડકારોનો સામનો કરવો પડશે. અને પ્રમુખ જો બિડેન અને હું અમારો ભાગ કરવા માટે પ્રતિબદ્ધ છીએ.
