ગુજરાતના બનાસકાંઠા જિલ્લાના ડીસા તાલુકાના માલગઢ ગામમાં એક જ પરિવારના સાત લોકોએ ઝેરી કેમિકલ પીને આપઘાત કરવાનો પ્રયાસ કર્યો હતો. પોલીસે શુક્રવારે કહ્યું કે તેમને હોસ્પિટલમાં દાખલ કરવામાં આવ્યા છે, જ્યાં ત્રણ લોકોની હાલત ગંભીર છે. ડીસા ગ્રામ્ય પોલીસના જણાવ્યા મુજબ, પરિવારના વડા નટુભાઈ વાલ્મીકી કે જેઓ પચાસના દાયકામાં છે, તેણે પરિવારના અન્ય છ સભ્યો સાથે જીવનનો અંત લાવવાનો પ્રયાસ કર્યો હતો. બુધવારે સાંજે તેણે પરિવારના તમામ સભ્યોને ઝેરી લસ્સી પીવડાવી હતી.
સગા સંબંધીઓ અને આસપાસના લોકો તમામને સારવાર માટે ડીસા સરકારી હોસ્પિટલમાં લઈ ગયા હતા. પોલીસના જણાવ્યા અનુસાર, ઝેરી લસ્સી પીનારાઓમાં એવા બાળકોનો પણ સમાવેશ થાય છે, જેમની ઉંમર દોઢ વર્ષથી લઈને બાર વર્ષની વચ્ચે છે, જ્યારે માતાની ઉંમર સિત્તેર વર્ષની આસપાસ છે.
અધિકારીઓએ જણાવ્યું કે મજૂરની પત્નીનું તાજેતરમાં જ અવસાન થયું હતું. તે તેના બાળકો અને માતા સાથે રહેતો હતો. અધિકારીએ જણાવ્યું હતું કે નબુભાઈ વાલ્મીકી તેમની માતા, ત્રણ પુત્રો અને બે પુત્રીઓ સાથે હોસ્પિટલમાં સારવાર હેઠળ છે.
પોલીસના જણાવ્યા અનુસાર, ‘પત્નીને ગુમાવ્યા બાદ તે સતત માનસિક તણાવમાં રહેતો હતો અને તેના કારણે તેણે જીવનનો અંત લાવવાનો નિર્ણય કર્યો હતો. ઉપરાંત, તે ગયા પછી તેના પરિવારનું શું થશે તેની ચિંતા હતી, તેથી તેણે તેમને પણ મારવાનું નક્કી કર્યું. તપાસમાં જાણવા મળ્યું કે તેણે લસ્સીમાં જંતુનાશક ભેળવ્યું હતું જે તેણે પીધું હતું અને તેના પરિવારના સભ્યોને પણ આપ્યું હતું, એમ અધિકારીએ જણાવ્યું હતું. નટુભાઈ વાલ્મીકી સામે આત્મહત્યાનો પ્રયાસ અને પરિવારજનોને મારી નાખવાના પ્રયાસનો ગુનો નોંધવામાં આવી રહ્યો છે.
