કર્ણાટકના પૂર્વ મુખ્યમંત્રી બીએસ યેદિયુરપ્પાએ બુધવારે એક મોટી જાહેરાત કરી છે. તેમણે સ્પષ્ટ કર્યું કે તેઓ આ વખતે વિધાનસભાની ચૂંટણી નહીં લડે. યેદિયુરપ્પાએ પોતાની ઉંમરને ટાંકીને આ જાહેરાત કરી હતી. કહ્યું, ‘મેં વિધાનસભા ચૂંટણી નહીં લડવાનો નિર્ણય કર્યો છે. સીએમ પદ પરથી પણ રાજીનામું આપ્યું હતું કારણ કે મારી ઉંમર 80 વર્ષની થઈ ગઈ છે. મારી ઉંમર 80 વર્ષથી વધુ હોવા છતાં હું માત્ર આ વખતે જ નહીં પરંતુ આગામી વખતે પણ રાજ્યની મુલાકાત લઈશ. આપણે જોઈશું કે આ વખતે જ નહીં પરંતુ આગામી વખતે પણ બહુમતી મળે.
યેદિયુરપ્પાએ વધુમાં કહ્યું કે, ‘અમે કર્ણાટકમાં પૂર્ણ બહુમતી મેળવવા જઈ રહ્યા છીએ. પીએમ મોદીના નેતૃત્વમાં અમે ફરી સત્તામાં આવીશું. કોંગ્રેસ ભ્રષ્ટ છે એટલે 40% કમિશનના ખોટા આક્ષેપો કરી રહી છે, આ મતદારોનો મુદ્દો નથી.
10મીએ ચૂંટણી, 13મીએ પરિણામ આવશે
બુધવારે કર્ણાટકમાં વિધાનસભા ચૂંટણીની તારીખોની જાહેરાત કરવામાં આવી હતી. રાજ્યમાં 10 મેના રોજ મતદાન થવાનું છે. તેનું પરિણામ 13 મેના રોજ આવશે. રાજ્યમાં 224 સભ્યોની વિધાનસભા છે. હાલ કર્ણાટકમાં ભાજપની સરકાર છે. ચૂંટણી પંચના જણાવ્યા અનુસાર આ ચૂંટણીમાં કુલ પાંચ કરોડ 21 લાખ 73 હજાર 579 મતદારો તેમના મતાધિકારનો ઉપયોગ કરશે. તેમાંથી 2.59 કરોડ મહિલાઓ છે, જ્યારે 2.62 કરોડ પુરુષ મતદાતા છે. ચૂંટણી પંચના જણાવ્યા અનુસાર, રાજ્યમાં કુલ 9.17 લાખ મતદારો હશે જેઓ પ્રથમ વખત મતદાન કરશે. તેમની ઉંમર 18 થી 19 વર્ષની વચ્ચે છે.
