એપ્રિલમાં ગુડ્સ એન્ડ સર્વિસ ટેક્સ (GST) કલેક્શનમાં રેકોર્ડ વધારો નોંધાયો છે. નવા નાણાકીય વર્ષના પ્રથમ મહિનામાં GST કલેક્શન વાર્ષિક ધોરણે 12 ટકા વધીને 1.87 લાખ કરોડ રૂપિયા પર પહોંચી ગયું છે. આ એક મહિનામાં એકત્ર કરાયેલી સૌથી વધુ GST આવક છે. જુલાઈ 2017 માં GST લાગુ થયા પછી, સૌથી વધુ ટેક્સ કલેક્શનનો અગાઉનો રેકોર્ડ 1.68 લાખ કરોડ રૂપિયાનો હતો, તે ગયા વર્ષે એપ્રિલમાં બન્યો હતો.
અત્યાર સુધીનું સૌથી વધુ GST કલેક્શન
પીએમ મોદી તરફથી ટ્વિટમાં કહેવામાં આવ્યું છે કે, ‘ભારતીય અર્થવ્યવસ્થા માટે મોટા સમાચાર છે. ટેક્સનો દર ઓછો હોવા છતાં ટેક્સ કલેક્શનમાં વધારો GSTની સફળતા દર્શાવે છે. આ સમજાવે છે કે કેવી રીતે GST એ એકીકરણ અને પાલનમાં વધારો કર્યો છે. નાણા મંત્રાલયે એપ્રિલ, 2023 માટે ટેક્સ કલેક્શનના આંકડા જાહેર કરતા જણાવ્યું હતું કે ગયા મહિને કુલ GST કલેક્શન રૂ. 1,87,035 કરોડ હતું. જેમાં સેન્ટ્રલ GST (CGST) રૂપિયા 38,440 કરોડ, સ્ટેટ GST (SGST) રૂપિયા 47,412 કરોડ અને ઇન્ટિગ્રેટેડ GST (IGST) રૂપિયા 89,158 કરોડ હતો.
ગત નાણાકીય વર્ષ કરતાં 22 ટકા વધુ
GST કલેક્શનના આંકડાઓમાં રૂ. 12,025 કરોડ (આયાતી માલ પર પ્રાપ્ત રૂ. 901 કરોડ સહિત)નો સેસ પણ સામેલ છે. મંત્રાલયે કહ્યું, ‘એપ્રિલ, 2023માં જીએસટી કલેક્શન એક વર્ષ અગાઉના સમાન મહિનાની સરખામણીમાં 12 ટકા વધુ રહ્યું છે.’ આ સમયગાળા દરમિયાન, ઘરેલું વ્યવહારો (સેવાઓની આયાત સહિત)માંથી કરની આવક એક વર્ષ અગાઉ કરતાં 16 ટકા વધુ છે. નાણાકીય વર્ષ 2022-23માં GSTનું કુલ કલેક્શન 18.10 લાખ કરોડ રૂપિયા હતું, જે પાછલા નાણાકીય વર્ષ કરતાં 22 ટકા વધુ છે.
મંત્રાલયે એમ પણ કહ્યું કે માર્ચ 2023માં નવ કરોડ ઈ-વે બિલ જનરેટ થયા હતા, જે ફેબ્રુઆરી 2023ના 8.1 કરોડ બિલ કરતાં 11 ટકા વધુ છે. સરકારે એપ્રિલ દરમિયાન IGSTમાંથી સેન્ટ્રલ GST (CGST)માં રૂ. 45,864 કરોડ અને સ્ટેટ GSTમાં રૂ. 37,959 કરોડનું સેટલમેન્ટ કર્યું હતું. રેગ્યુલર સેટલમેન્ટ પછી એપ્રિલ 2023માં કેન્દ્ર અને રાજ્યોની કુલ આવક સેન્ટ્રલ જીએસટીના કિસ્સામાં રૂ. 84,304 કરોડ અને રાજ્ય જીએસટીના સંદર્ભમાં રૂ. 85,371 કરોડ હતી.
GST કલેક્શન પર, ઇન્ડસ્ટ્રી બોર્ડ એસોચેમના પ્રેસિડેન્ટ અજય સિંહે કહ્યું કે એપ્રિલમાં રેકોર્ડ GST કલેક્શન નાણાકીય વર્ષ 2023-24ની શાનદાર શરૂઆત છે. તેમણે કહ્યું હતું કે, “ગ્રાહકોની માંગમાં તેજી સાથે GST સંગ્રહનો આંકડો દેશના અર્થતંત્રમાં મજબૂત વૃદ્ધિનો સંકેત છે.”
