રાજ્યસભાની વિશેષાધિકાર સમિતિની બેઠક 9 જાન્યુઆરીએ થશે, જેમાં વિપક્ષના 11 સાંસદોને સસ્પેન્શન મુદ્દે તેમના વિચારો રજૂ કરવાની તક આપવામાં આવશે. તાજેતરમાં સંસદનું શિયાળુ સત્ર પૂરું થયું. સૂત્રોના જણાવ્યા અનુસાર રાજ્યસભાની વિશેષાધિકાર સમિતિએ ઉપાધ્યક્ષ હરિવંશની અધ્યક્ષતામાં બેઠક બોલાવી છે.
તાજેતરમાં પૂરા થયેલા શિયાળુ સત્ર દરમિયાન 11 સાંસદોને સસ્પેન્ડ કરવા સંબંધિત એક સહિત અનેક બાબતો સમિતિ સમક્ષ પેન્ડિંગ છે. વિશેષાધિકાર સમિતિનો અહેવાલ પ્રાપ્ત કર્યા પછી ગૃહ દ્વારા તેમના કેસની વિચારણા ન થાય ત્યાં સુધી સાંસદો સસ્પેન્ડ રહેશે.
ઉલ્લેખનીય છે કે સંસદના શિયાળુ સત્ર દરમિયાન લોકસભાના 100 અને રાજ્યસભાના 46 સભ્યોને સસ્પેન્ડ કરવામાં આવ્યા હતા. આ સભ્યો પ્લેકાર્ડ લઈને આવ્યા હતા અને સંસદની સુરક્ષાના ઉલ્લંઘનના મુદ્દે ગૃહ પ્રધાન અમિત શાહના નિવેદનની માંગ કરતા સૂત્રોચ્ચાર કર્યા હતા. ઉલ્લેખનીય છે કે, રાજ્યસભાના 11 સભ્યોને 18 ડિસેમ્બરે ગંભીર અવ્યવસ્થા સર્જવા બદલ સસ્પેન્ડ કરવામાં આવ્યા હતા અને તેમના કેસ વિશેષાધિકાર સમિતિને મોકલવામાં આવ્યા હતા.
