Weather Update: ઉત્તર ભારતમાં કાળઝાળ ગરમી અને ગરમીના મોજાએ લોકો પરેશાન કરી દીધા છે. ભારતીય હવામાન વિભાગ (IMD)નું કહેવું છે કે અત્યારે આમાંથી રાહત મળવાની કોઈ શક્યતા નથી. રિપોર્ટ અનુસાર, આગામી 5 દિવસ સુધી પૂર્વ ભારતના મોટા ભાગોમાં ગરમીનું મોજું યથાવત રહેશે. પશ્ચિમ બંગાળ, ઓડિશા, ઝારખંડ અને બિહારના ભાગોમાં હીટ વેવની સ્થિતિ પ્રવર્તી રહી છે અને આ મહિનામાં આ બીજી વખત છે. હવામાન વિભાગના જણાવ્યા અનુસાર, ઓડિશામાં ગંગાના કિનારાના વિસ્તારોમાં 15 એપ્રિલથી અને પશ્ચિમ બંગાળમાં 17 એપ્રિલથી ગરમીની લહેર પ્રવર્તી રહી છે. દરિયાકાંઠાના આંધ્રપ્રદેશ, તમિલનાડુ, પુડુચેરી, કર્ણાટક, ગોવા, કેરળ, પશ્ચિમ બંગાળ અને બિહારના લોકો માટે ઉચ્ચ ભેજ સમસ્યાઓમાં વધારો કરી શકે છે.
IMD અનુસાર, આગામી 3 દિવસમાં રાષ્ટ્રીય રાજધાની દિલ્હીમાં મહત્તમ તાપમાન 40 ડિગ્રી સેલ્સિયસ સુધી પહોંચી જશે. મંગળવારે દિલ્હીમાં દિવસ દરમિયાન સ્વચ્છ આકાશ અને તીવ્ર પવનની અપેક્ષા છે. આજે રાજધાનીમાં મહત્તમ અને લઘુત્તમ તાપમાન અનુક્રમે 38 અને 22 ડિગ્રી સેલ્સિયસની આસપાસ રહેવાની ધારણા છે. દિલ્હીના પ્રાદેશિક હવામાન કેન્દ્રના વૈજ્ઞાનિક કુલદીપ શ્રીવાસ્તવે કહ્યું, ‘આગામી દિવસોમાં ગરમીની લહેર આવવાની કોઈ શક્યતા નથી, પરંતુ આગામી ત્રણ-ચાર દિવસમાં દિલ્હીમાં તાપમાન 40 ડિગ્રી સેલ્સિયસ સુધી પહોંચી જશે.’ શ્રીવાસ્તવે કહ્યું કે નવું વેસ્ટર્ન ડિસ્ટર્બન્સ ઉત્તર પશ્ચિમ ભારતની નજીક પહોંચશે, પરંતુ રાજધાની પર તેની કોઈ અસર નહીં થાય. તેમણે કહ્યું કે આથી આગામી સપ્તાહમાં દિલ્હીમાં આકાશ સ્વચ્છ રહેશે અને વરસાદની કોઈ આગાહી નથી.
10 થી 20 દિવસ સુધી હીટ વેવની શક્યતા
હવામાન વિભાગના જણાવ્યા અનુસાર, એપ્રિલમાં દેશના વિવિધ ભાગોમાં એકથી ત્રણ દિવસના સામાન્ય સમયગાળાની સરખામણીએ ચારથી આઠ દિવસ સુધી ગરમીનું મોજું રહેવાની શક્યતા છે. સમગ્ર એપ્રિલ-જૂન સમયગાળા દરમિયાન સામાન્ય ચારથી આઠ દિવસની સરખામણીમાં 10 થી 20 દિવસ સુધી ગરમીના મોજાં રહેવાની શક્યતા છે. જ્યારે મહત્તમ તાપમાન મેદાનોમાં ઓછામાં ઓછું 40 ડિગ્રી સેલ્સિયસ, દરિયાકાંઠાના વિસ્તારોમાં 37 ડિગ્રી અને પર્વતીય વિસ્તારોમાં 30 ડિગ્રી સેલ્સિયસ સુધી પહોંચે ત્યારે આ સ્થિતિ સર્જાય છે. આ સામાન્ય કરતાં ઓછામાં ઓછું 4.5 ડિગ્રી સેલ્સિયસ વધુ છે. જ્યારે મહત્તમ તાપમાન સામાન્ય કરતાં 6.4 ડિગ્રી સેલ્સિયસ વધારે હોય ત્યારે તીવ્ર ગરમીનું મોજું જાહેર કરવામાં આવે છે.
જાણો એમપી, ગુજરાત અને મહારાષ્ટ્રની સ્થિતિ
મધ્યપ્રદેશમાં 23 એપ્રિલના રોજ રાત્રિનું તાપમાન ઘણું વધારે રહેવાની શક્યતા છે. રાત્રે ઉંચુ તાપમાન ખતરનાક માનવામાં આવે છે, કારણ કે શરીરને ઠંડુ થવાની તક મળતી નથી. ગુજરાત, ઓડિશા, આંધ્રપ્રદેશ, મહારાષ્ટ્ર, વિદર્ભ, મરાઠવાડા, બિહાર અને ઝારખંડમાં વધુ ગરમીના દિવસોની આગાહી કરવામાં આવી છે. કેટલાક સ્થળોએ 20 થી વધુ ગરમીના મોજાના દિવસો નોંધવામાં આવી શકે છે. તે જ સમયે, આગામી 5 દિવસ દરમિયાન આંધ્રપ્રદેશ, દક્ષિણ કોસ્ટલ આંધ્રપ્રદેશ અને રાયલસીમાના અલગ-અલગ સ્થળોએ ગરમ અને ભેજવાળું હવામાન રહેવાની અપેક્ષા છે. આ વિસ્તારોમાં, આગામી 24 કલાક દરમિયાન અલગ-અલગ સ્થળોએ 30-40 કિમી પ્રતિ કલાકની ઝડપે વીજળી અને જોરદાર પવન ફૂંકાવાની અપેક્ષા છે. આગામી ચાર દિવસ દરમિયાન અને રાયલસીમામાં આગામી 24 કલાક દરમિયાન એક કે બે સ્થળોએ હળવાથી મધ્યમ વરસાદ અથવા ગાજવીજ સાથે વરસાદની અપેક્ષા છે.
